Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

Dolomites UNESCO Geotrail, percurs danter la storia dles Dolomites

Te diesc tapes él partí sö le Dolomites UNESCO Geotrail sön la creaziun dles Dolomites. Tommasini y Mussner á presenté le liber nü incö sön Col Raiser.

Percurs geologich nü amesa la contrada dles Dolomites  (FOTO: LPA/Roman Clara)

176 chilometri é le Dolomites UNESCO Geotrail lunch, n percurs de trekking che porta sön sëmenes bele esistëntes dal Bletterbach cina Sest de Puster. Les diesc tapes dl percurs geologich é coliades da na vëta cocëna y pro vigni tapa él da inrescí cosses interessantes sön la storia geologica dles Dolomites.

I assessurs Christian Tommasini y Florian Mussner á presenté la publicaziun nöia ai 2 de agost sön Col Raiser, olache le percurs dla cuinta tapa passa nia dalunc. La presentaziun é gnüda a se le dé en colaboraziun cun i auturs Christjan Ladurner y Corrado Morellio adöm al geologh Volkmar Mair.

“Dan da 280 miliuns de agn êl chiló n mer y sëgn podunse osservé la belëza dles munts dles Dolomites – sciöche la contrada s’á mudé tl tëmp, dantadöt por ci che reverda l’aspet geologich é la tematica zentrala dla publicaziun nöia”, á splighé Tommasini. L’assessur á rengrazié düc chi che á daidé para pro la realisaziun dl proiet y á sotrissé che ala basa de chësta publicaziun él sté n gran laur de inrescida scientifica y culturala. L’assessur por la scora ladina Florian Mussner á descrit le percurs sciöche na carateristica nöia dl’oferta dl jí a pé amesa le patrimone mondial dles Dolomites Unesco y che presentëia la geologia dles DOlomites te na forma scëmpla y pratica. “Implü unësc chësc percurs ince deplü cultures”, á dit Mussner. Le Geotrail nü dess since ester, aladô de Enrico Brutti, diretur dl Ofize Parcs naturai, n stromënt de sensibilisaziun por la popolaziun local sön l’importanza y la particolarité dles Dolomites sciöche patrimone mondial UNESCO.

“19 é i punc particolars dla geologia sön le percurs che presentëia la geologia dles Dolomites te na manira interessanta sides por i escurscionisć, mo ince por i leturs dl liber”, á dit le diretur dl Ofize Geologia Volkmar Mair.

Pröm punt dl Geotrail é le Bletterbach. Da dailó é le percurs che porta por 176 chilometri sön sëmenes atuales cina Sest tla Pusteria. Na gran pert dl percurs passa ince por les valades ladines. Le tru cun ince döes chertes de referimënt é da püch gnü publiché dal’editur Athesia-Tappeiner. La publicaziun nöia pó gní cumprada por 17,80 euro tles botëghes dai libri y tles assoziaziuns turistiches.

La particolarité dl Geotrail é che al é partí sö te 10 tapes y che vigni tapa é coliada da na vëta cocëna cun la proscima. Pro vigni tapa él gnü chirí fora dui posć, olache al vëgn splighé la geologia dles Dolomites. Vigni percurs vëgn presenté te n capitul aposta.

La publicaziun nöia é gnüda realisada en colaboraziun cun l’Ofize Parcs naturai y dal Ofize Geologia, dal editur Athesia-Tappeiner, dal IDM Südtirol y dales organisaziuns turistiches dl raiun dles Dolomites.  

File Video y Audio

Presentaziun Geotrail

Intervista Christian Tommasini

Intervista Volkmar Mair

Intervista Christjan Ladurner

Audio Morelli – Mair – Tommasini

(USP)