Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

Lites provinziales 2018: organisaziun piada ia y portal web nü

L'organisaziun dles lites provinziales 2018 é piada ia. Plata web online, la novité dla verjiun ingleja, fissades les retüdes ai Comuns.

Lites provinziales 2018: le portal web nü é online

Ai 21 d'otober dl 2018 él les lites provinziales 2018 por renové le Consëi provinzial, y intratan á bele metü man l'organisaziun. Chisc dis á l’Ofize Afars istituzionai dla Provinzia metü online en colaboraziun cun l’Informatica Alto Adige le portal web dles lites provinziales 2018. Sön le sit http://lites.provinzia.bz.it él n valgönes novités respet al passé: imprömadedöt n logo nü (blanch, cöce y lominus bröm) y na grafica che costituësc ince la coporate identity nöia por i materiai litai. N'atra novité é la verjiun por inglej dles informaziuns por alisiré la comprenjiun da pert di zitadins foresti. Dlungia les informaziuns prinzipales (por ci che an lita, che che pó lité, sciöche an lita) él ince na seziun cun les domandes che vëgn fates plü sovënz olache an pó interagí cun l’aministraziun y ciafé na resposta.

Lité por corespondënza

Na seziun é dedicada al lité por corëspondënza. Les litadësses y i litadus dl Südtirol che á la residënza foradecá y é scrić ite tl AIRE (register anagrafich di zitadins talians cun la residënza foradecá) pó tó pert ales lites provinziales don jö la usc por corespondënza. Le medemo pó fá les litadësses y i litadus che ne sciafia nia da lité tl comun de residënza, ajache ai vir temporaneamënter defora dla provinzia. Les proscimes edemes ortiará l’Ofize Afars istituzionai a che che á la residënza foradecá che á le dërt da lité na comunicaziun sön la data dles lites y les modalités d'espresciun dla usc por corespondënza.

Cosć di comuns

La Junta provinziala á preodü tla sentada da inier (24 de messé) indöt 1,3 miliuns de euro da ti paié ai Comuns por i sorvisc liá al dërt desfiramënt dles operaziuns litales. Les somes destinades ai singui Comuns sciöche contribut tëgn cunt dl numer dles seziuns litales; la soma dl contribut é gnüda fata fora dal Ofize Afars istituzionai dl Secretariat general dla Provinzia y dal Consorz di Comuns. La Provinzia sostignará ince les spëises di Comuns por l’aredamënt dles sëntes, la compilaziun dles listes litales de seziun y le paiamënt dles porsones di ofizi litai de seziun. La Junta provinziala á preodü indöt 455.000 euro por chësc fin. I Comuns messará dé jö le decunt dles spëises al Ofize Afars istituzionai cina i 20 de novëmber dl 2018.

(USP)