Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

#dolomitesvives: Dai 23 de lugio test por smendrí le trafich söl Sela

Dai 23 de lugio cina ai 31 d’agost gnarál a se le dé limitaziuns dl trafich por rové söl Ju dl Sela. Autorisaziuns cun la App OpenMove.

Dai 23 de lugio cina ai 31 d’agost gnarál a se le dé limitaziuns dl trafich por rové söl Ju dl Sela. Autorisaziuns cun la App OpenMove

Do na pröma sperimentaziun fata tl 2017 cun la stlüta al trafich vigni mercui d’isté, gnarál inann fat na scomenciadia nöia de limitaziun dl trafich söl Ju dl Sela tl contest de #dolomitesvives. “Do chësta fasa de sperimentaziun orun spo rové le proscim ann a na soluziun definitiva por la mobilité sostenibla söl Ju dl Sela por le 2019”, spliga i assessurs por la mobilité Florian Mussner y Mauro Gilmozzi y por l’ambiënt Richard Theiner. L’obietif é da smendrí le trafich cuotidian dl 20 porcënt. Chël ó dí che dansimdé dessel passé cina 200 auti, domisdé danter 100 y 150.

Les limitaziuns dl trafich gnará a se le dé dal 23 de messé ai 31 de agost dl 2018, dal lönesc al vëndres, dales 09.00 ales 16.00. Tratan i mëisc da d’isté gnarál potenzié i mesi dl trasport publich da Urtijëi cina sö al Ju dl Sela, y chësc danmisdé y domisdé cun n passaje vigni 15 menüc. Da Corvara jará na coriere vigni ora söl Ju dl Sela. Implü él poscibl da adoré les furnadoies da Plan de Gralba cun la furnaodia Piz Seteur y inant a pe o cun le lift a sciagns Gran Paradiso, da Sëlva cun la furnadoia Ciampinoi y inant a pe y da Santa Cristina cun le lift a sciagns Monte Pana y spo cun le lift a scagns Mont de Seura y inant a pe.

Al podará rové söl Ju dl Sela auti y veicui cun n pass debann che ará na validité de n ora y che an pó damané diretamënter pro les posiziun de informaziun y registraziun posizionades dlungia la strada te trames dles direziuns. Por ci che reverda al pert de Gherdëna sará i punc d’informaziun pro l’ex Hotel Miramonti a Plan de Gralba y a Ruacia a Santa Cristina. Por ci che reverda le Trentin sará i punc pro le Lupo Bianco a Mazin, Plan de Schiavaneis, Cianacëi y Alba de Cianacëi.

Implü sarál ince poscibl da ciafé i pass online le de dan la jita tres la App OpenMove dal 22 de lugio inant cun la parora de chirida “Passo Sella”.

 Jí sö debann zënza limitaziuns pó i veicui eletrics, les rodes, chi che vá a pe, i mesi publics, i ghesć di hotí söl Sela, les porsones che laora lassö y mesi d’emergënza. Autorisaziuns aposta pó gní domanades cun na email a: info@dolomitesvives.com

#dolomitesvives vëgn metü da jí dales Provinzies de Balsan y Trënt, dai Comuns interessá, dales Assoziaziuns turistiches, dal IDM y dala Fondaziun Dolomites UNESCO. Por de plü informaziuns: www.dolomitesvives.com

(USP)