Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

#5: Bilanz dla Junta provinziala, Schuler mët man ai 9 de lugio

Ti mëisc de lugio y agost fajará la Junta provinziala n bilanz dla legislatöra. Indöt él nü termins sön le program dai 9 de lugio ai 21 de agost.

Hashtag 5

La perioda de legislatöra é tl rové a piz. Ai 21 d’otober sarál les lites dl Consëi provinzial nü. Sot al moto #5 organisëia tles proscimes edemes i mëmbri dla Junta provinziala tl contest de na seria de evënc na suraodüda sön le laur fat ti ultims cinch agn.

La pröma incuntada gnará organisada en lönesc ai 9 de lugio dal assessur por l’agricoltöra, i bosc, la proteziun zivila y i comuns Arnold Schuler. En jöbia ai 12 de lugio sarál spo la ota dl vizepresidënt dla Junta Christian Tommasini ,che é responsabl di seturs dla scora y cultura taliana, dl frabiché abitatif y dl patrimone. Ai 18 de lugio él sön le program la scomenciadia cun l’assessuria Waltraud Deeg, competënta por i seturs dla familia, dl’aministraziun y dl’informatica.

Le presidënt dla Provinzia, Arno Kompatscher, tignará süa manifestaziun en jöbia, ai 19 de lugio por ci che reverda na suraodüda generala y i reparc de competënza economia, inovaziun y Europa.  En vëndres ai 20 de lugio sarál la ota dl assessur por la cultura ladina Florian Mussner che rajonará ince di seturs mobilité, strades, bëgns culturai y museums- Le vizepresidënt dla Junta Richard Theiner rajonará de so bilanz en lönesc, ai 23 de lugio por ci che reverda l’ambiënt, l’energia y l’urbanistica. En mercui al 1 de agost él sön le program l’incuntada cun l’assessur Philipp Achammer, che á manajé les tematiches formaziun, scora y cultura todëscia y integraziun. La seria de manifestaziuns gnará stlüta jö dal’assessuria por la sanité, le sozial, le sport y l’avalianza de oportunités Martha Stocker en vëndres ai 3 de agost.

(USP)