Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

Secundo Prener Meeting: spostamënt asvelt dala strada sön les scines

Demanco trafich dles marcianzies sura le Prener y deplü sön les scines: chisc é i contignüs prinzipai dl’acordanza firmada incö (12 de jügn) a Balsan.

Sposté le trafich dala strada sön les scines: chësc é un di obietifs prinzipai dl presidënt Arno Kompatscher (Foto USP/Peter Daldos)

“I laorun inant por n spostamënt asvelt dl trafich sura le Prener. La tematica zentrala reverda la sanité di zitadins, la sconanza dl ecosistem sensibl alpin y la cualité dla vita en general”, á sotligné le presidënt dla Provinzia Arno Kompatscher tl contest dl secundo Prener Meeting incö (ai 12 de jügn) a Balsan. Indöt é le numer di camions che passa sura le Prener sura 2,2 miliuns vigni ann, cun n trend de chersciüda inann dl 14 porcënt. “Sön la basa de chisc numeri che porta para n impat posoch por porsones y ambiënt sun düc a öna che ara ne vá nia da jí inant insciö y che an mëss tó dezijiuns atira. Al vá debojëgn da aumenté les tarifes dl’autostrada por le trasport de marcianzies, na tarifa unica por le ciarburant sön döta trata dl Prener y na proibiziun por i camions da passé sön la strada statala dl Prener”, á dit Kompatscher presentan les propostes dla Provinzia de Balsan por sposté le trasport de marcianzies sön les scines.

Al secundo Prener Meeting convoché da Pat Cox, coordinadú por le coridor europeich danter la Scandinavia y le Mer Mediteran, tl NOI Techpark a Balsan ál tut pert le Minister por le trasport dl’Austria, Norbert Hofer, le secreter de Stat dl Minister por el trasport di Paisc Todësch, Steffen Bilger, la ministra por le trasport dl Paiern, Ilse Aigner, le diretur general por les infrastrotöres feroviares dl Minister por le infrastrotöres dla Talia, Enrico Pujia, y i presidënc dl’Euregio Arno Kompatscher, dl Tirol Günther Platter y dl Trentin Ugo Rossi adöm ince al suranstant dla seziun logistica dla Regiun Veneto Elisa Di Berti. Tl zentër dl’incuntada él sté les mosöres por le smendrimënt dl trafich dles marcianzies sön la linia dl Prener.

Percurs europeich deboriada

“Do tratatives lungies cun i rapresentanc di Stac y dles Regiuns él sëgn finalmënter poscibl da fá n vare fondamental söl percurs deboriada y da firmé le Memorandum of understanding por la realisaziun dl coridor TEN-V danter la Scandinavia y le Mer Mediteran”, á dit le commissar Pat Cox che á laldé l’impëgn dl presidënt dla Provinzia de Balsan Arno Kompatscher por ci che reverda la pert taliana dl coridor dl Prener. “La firma dl Memorandum da pert dl minister por le trasport talian Danilo Toninelli é la conferma che al é la orenté da jí inant te chësta direziun”, á comenté Kompatscher. Cox se á dit dejplajü che le presidënt dl Tirol, Günther Platter, ne á nia firmé le Memorandum. Indere él ince gnü firmé da pert dl presidënt Platter le protocol ajuntif cun mosöres concretes sciöche la tarifa unica, le spostamënt sön les scines, la politica de avalianza di prisc dl diesel, n numer mascimal de camions y le stop ai camions sön les strades statales. Kompatscher é sté contënt che le Minister Hofer á firmé le protocol ajuntif. "L'incuntada da incö é stada n suzes por l'ampliamënt dl trasport sön scines y por la realisaziun concreta de mosöres ajuntives", á dit Kompatscher. "I orun mioré les condiziuns de vita locales y ince l'azetanza dl'Europa y i sarun ma bugn da arjunje chësc obietif laoran deboriada", á dit Cox.

Le presidënt Arno Kompatscher á recordé la chestiun dl trafich de marcianzies sposté da d’atres trates, che fej ma la trata dl Prener deache ara costa demanco co les atres, y nia deache ara é la plü cörta. "Vigni spostamënt de n camion sön les scines é n aiüt", á dit le Minister por le trasport austriach Hofer. La delegaziun dala Germania cun Bilger y Aigner á dit che l'incuntada da incö é importanta por s'ajorné sön les tematiches dl trafich y á dit de ester a öna por n aumënt dla tarifa autostradala por i camions. "Sun oramai jüs sura le limit de azetanza fora por les porsones, la natöra y ince l'infrastrotöra", á dit Platter. Di Berti y Pujia á dit che al se trata de na firma storica che é importanta por l'ampliamënt dla rëi feroviara tla Talia.

Marcianzies: dala strada sön les scines

La proposta da atué mosöres por sostigní le spostamënt sön les scines é sté n punt, olache düc é stá a öna. Sön la basa di resultac dl proiet Ue Brenner LEC (Lower Emission Corridor) él sté le grup a öna da avëi n control dinamich dla velozité sön la trata dl Prener. La Provinzia de Balsan sostëgn ince n stop al passaje di camions sön les strades statales che é bele en forza tl Tirol. N ater vare important, é aladô de Kompatscher, l’introduziun de na tarifa unitara por le ciarburant di camions sön döta la trata dl Prener. Les mosöres de Balsan y Trënt á bele preodü mosöres por realisé le terminal nü che consënt n trasport combiné plü asvelt a plü bunmarcé. Por aumenté la competitivié tl trafich feroviar mëssel gní renové i terminals, adoré ferates che fej manco vera y che alisirëia l’adoranza dl trafich combiné. Implü i davagns da tarifes plü altes mëss gní adorades por sostigní le trafich sön scines. N obietif strategich dl’Euregio é chël da rové tl 2027 a na avalianza dla repartiziun tlamada “modal split” y chël ó dí da avëi le medemo numer de marcianzies sön les scines co sön strada. Tl 2035 dess la relaziun ester de 70 porcënt sön les scines y de 30 sön strada.

Videos da desciarié jö

Sentada generala (pröma pert)

Sentada generala (secunda pert)

Firma acordanza

Imajes conferënza stampa

Intervista Pat Cox

Intervista Arno Kompatscher

Intervista Norbert Hofer

(USP)