Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

De gragn carnivors, prevenziun y intervënt: ok al dessëgn de lege

La Junta á aprové incö (ai 5 de jügn) le desëgn de lege dl assessur Schuler sön les laurs y i lus. La Provinzia fajará fora i prelevamënc, la piada o copada

Cherta cun les arees naturales y i prá da munt tl Südtirol

Le dessëgn de lege "Mosöres de prevenziun y d’intervënt sön i gragn carnivors" presenté incö (ai 5 de jügn) tla junta provinziala dal assessur por l’agricoltöra Arnold Schuler vëiga danfora che le presidënt dla Provinzia pois mëte a jí mosöres por la gestiun de laurs y lus. Sön la basa de chësc dessëgn de lege pó la junta despone le prelevamënt, la piada o copada de ejemplars, mo ma sce al n’é nia n’atra soluziun por gestí süa presënza y sce le prelevamënt ne preiudichëies nia le mantignimënt, te na situaziun de conservaziun che vá bun, dla popolaziun dla sort interessada te so raiun de repartiziun naturala.

Le dessëgn de lege, metü adöm da n articul su, vëiga danfora che le presidënt dla Provinzia adotëies les mosöres d’aplicaziun dla Diretiva Habitat de prevenziun y d’intervënt por gestí la presënza dla laurs y dl lu tl raiun provinzial tl respet di fins, dles condiziuns y di limic preodüs dala diretiva europeica sön chësc tema. La norma ne conzed indere nia prelevé, apié o copé ejemplars te so habitat natural.

“La Diretiva europeica habitat reverda tematiches de agricoltöra, sön chëra che la Provinzia á competënza primara. Chësc nes dá la poscibilité da rezepí diretamënter chësta normativa cun n dessëgn de lege por mëte en pratica les mosöres nezesciares por sconé l’agricoltöra da munt y la biodivesité dl teritore”, á stlarí le presidënt Arno Kompatscher. Vigni mosöra adotada mëss porchël gní tuta do avëi ciafé l’arat dl Istitut superiur por la proteziun y l’inrescida ambientala (ISPRA) y a vigni moda tl respet dles desposiziuns statales de referimënt. La norma garantësc porchël che la Provinzia ti dais al Stat les informaziuns  che vá debojëgn por ademplí i dovëis de comunicaziun dla Comisciun europeica.

 

(USP)