Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

La Ntendënta dla scoles ladines ie unida numineda

Edith Ploner sarà tl daunì a cë dla Ntendënza dla scoles ladines. La Jonta provinziela à numinà ncuei la ispetëura ora de na pruposta de trëi inuemes.

Edith Ploner sarà tl daunì a cë dla Ntendënza dla scoles ladines. La Jonta provinziela à numinà ncuei la ispetëura ora de na pruposta de trëi inuemes (Foto: USP)

Bonamënter da setëmber 2018 inant cundujerà Edith Ploner la Ntendënza ladina sëurantulan la ncëria de Roland Verra. Ncuei (ai 15 de mei) à la Jonta provinziela numinà la pedagoga, ex-diretëura y ispetëura per chësta stiera d’ezelënza sun pruposta dl Assessëur ladin per la Furmazion Florian Mussner ora de na pruposta de trëi inuemes che la repartizion ladina dl Cunsëi provinziel per la scoles ova prejentà.

Ploner ie nasciuda ai 20 de merz dl 1962 a San Martin de Tor y sta a La Val. La à studià scienzes dl’educazion al’Università de Verona. Do na esperienza de nseniamënt de diesc ani tla materies tecnich-pratiches tl Istitut tecnich cumerziel a La Ila àla dal 1990 al 2001 laurà tl Istitut pedagogich ladin coche respunsabla per l ciamp dla furmazion di nsenianc per duc i livei de istruzion. Dl 2004 iela deventeda diretëura dla scolines ladines, dal 2009 iela ispetëura dla scolines ladines. Dal 2011 à Ploner sëurantëut de plu ncëries de nseniamënt tla facultà de Scienzes dl’Educazion tla Università liedia de Bulsan. La à de plu cualificazions zertificades y spezialisazions. Ploner ie oradechël ativa te comisciuns defrëntes a livel provinziel, danter chisc l Cumité per la valivanza dla chances danter ëiles y ëi y l Cumité per l dërt de istruzion universitera. La ie nce stata ativa tla presidënza dla Cunvënzion d’autonomia. 

“Per si funzion nueva ie Edith Ploner scialdi bën cualificheda, la ne à nia mé de bona capaziteies dirigenzieles ma nce na gran esperienza tl ciamp dla furmazion y de boniscima cunescënzes tla materia” cunstatea l Assessëur provinziel Florian Mussner. “Cun ëila puderà la Ntendënza dla scoles ladines se svilupé inant cun mpulsc nueves per l daunì”, nsci Mussner. Ël à nce rengrazià i autri candidac David Lardschneider y Lara Moroder, che fova unic numinei dala sezion ladina dl Cunsëi scolastich, y l’autra doi candidates Susy Rottonara y Monika Insam. Ploner fova unida prejenteda per la funzion de Ntendënta da de plu cumëmbri de categories desfarëntes dla sezion ladina dl cunsëi scolastich provinzial.

L Ntendënt dla scoles ladines atuel Roland Verra, che ie stat tla ncëria per 26 ani, jirà n pension d’agosta dl 2018. Perchël iel de merz unì metù a jì l pruzedimënt per la numinazion de n Ntendënt nuef dla scoles ladines. Chësc pruzedimënt ie regulà dal Statut d’Autonomia (articul 19) y da si normes d’atuazion (D.P.R 89/83): La Jonta provinziela stabilësc chi che mëina la Ntendënza ladina y chël n basa a na pruposta de trëi inuemes che vën prejenteda dala repartizion ladina dl Cunsëi scolastich provinziel. Oradechël iel de bujën dl bensté dl Ministere dla Istruzion, dla Università y dla Nrescida.

Do la dezijion dla Jonta provinziela iel śën l Ministere dla Istuzion che muessa, tl tëmp de 60 dis, dé si apurvazion. Pona permò uniral fat la numinazion dla Ntendënta dla scoles ladines da pert dl Presidënt dla Provinzia Arno Kompatscher.

Cun Edith Ploner iel śën per l prim iede tla storia dla scola de nosta provinzia unì numinà n’ëila a cë dla Ntendënza ladina. La zapa tla piedies de Franz Vittur y Roland Verra.

 

(USP)