Vai al contenuto principale Vai alla navigazione principale Vai alla navigazione secondaria

Ufize stampa dla Provinzia

Incuntades ti Comuns: Kompatscher röia daimpró al'incuntada numer 100

Les incuntades di Comuns dl Südtirol é ponsades sciöche forma de dialogh y de informaziun. Le presidënt Kompatscher á ince bele vijité de plü Comuns ladins.

Le presidënt Kompatscher tratan öna dles 95 incuntades publiches comunales (Foto USP)

Dialoghé te na manira trasparënta cun le maiú numer de zitadins poscibli: chësc é sté un di obietifs prinzipai che le presidënt dla Provinzia, Arno Kompatscher, á stabilí tl mëteman de süa legislatöra. Ti ultims cater agn y mez á le presidënt Komaptscher tut pert, sön invit di ombolc,  a indöt 95 incuntades publiches ti Comuns dl Südtirol, incuntan ince les juntes y i consëis di Comuns. Tratan chëstes incuntades á Kompatscher albü la poscibilité da ascuté sö domandes y dejiders di zitadins: tut pert ál indöt a chëstes incuntades söporjö 15.600 porsones cun la pröma incuntada publica che é gnüda organisada ai 22 de aurí dl 2014 a Laas tl Vinschgau. Sciöche valur mesan ál tut pert indöt 165 porsones cun la partezipaziun plü alta arjunta a Porsenú tl 2016 cun 380 partezipanc.

Tratan  la perioda dla legislatöra él ince gnü a se le dé n mudamënt dles tematiches afrontades: ti pröms mëisc ê i argomënc prinzipai le program de guern, l’autonomia, les alisiraziuns fiscales, mo ince i paiamënc ai politics. “N valgügn temesc sciöche la mobilité y le trafich romagn tres atuai – dij Kompatscher -, indere d’atri sciöche l’energia y l’aeroport ne é nia plü tl zënter dles debatüdes do les dezijiuns tutes”. Sciöche valur mesan á le presidënt dla Provinzia de Balsan respognü vigni sëra a domandes sön zirca 10 argomënc desvalis, se tolon tëmp 6 ores vigni iade por se arjigné ales incuntades. Te chisc dis él le presidënt che á de plü incuntades cun i zitadins a Balsan y ai 15 de ma a Türesc. Por ci che reverda i Comuns ladins á le presidënt dla Provinzia vijité sön invit di ombolc i Comuns de Mareo, La Val, Corvara, Badia y Urtijëi.

(USP)