Vai al contenuto principale Vai alla navigazione principale Vai alla navigazione secondaria

La Rëi Zivica ciafa na misciun internet nöia

ojeplataLa Rëi Zivica oj plata: dala fin de merz se trasferësc la Rëi Zivica sön www.reizivica.bz.it y ti lascia al'Aministraziun provinziala le demane www.provinzia.bz.it.

Deboriada cun n demane nü ciafa l'Aministraziun provinziala inće na süa plata d'azès y n motor de chirida efiziënt fora dla ćiasa Google, che ti po pormez a düć i contignüs y sorvisc dl'aministraziun interna. Ćina śëgn ê la presënza tl internet strotorada aladô de departimënć, repartiziuns y ofizi, śëgn gnaràra organisada aladô de temesc. Chësta strotoraziun dess scemplifiché la chirida de informaziuns a dötes chës porsones che ne conësc nia cis l'organigram dl'Aministraziun provinziala y les competënzes desvalies di ofizi y dles repartiziuns. L'assegnaziun di temesc é porater inće gnüda a s'al dè cun l'aiüt dl feed-back dles zitadines y di zitadins che à portè dant sües propostes tl cheder dl online-cardsorting l'ann passè da d'altonn.
Sön öna dles 15 plates tematiches nöies podarëise tosc gnì alsavëi döt sura le turism y la mobilité tl Südtirol, l'agricoltöra y i bosć, l'ert y la cultura, le laûr y l'economia, la formaziun y le lingaz o sön un di atri temesc. Navighede tres chëstes plates o dede madër ite Osta parora tla chirida lëdia.

La Rëi Zivica resta anfat y é da ciafè dala fin de merz inant sot a www.reizivica.bz.it sciöche portal internet oramai esperimentè dles aministraziuns publiches tl Südtirol y plü avisa cun i contignüs dl'Aziënda sanitara, dl Consorz di Comuns, di Raiuns soziai y sciöche denant inće dl'Aministraziun provinziala.

Le layout dla plates provinziales nöies, strotorades bun y saurides da d'adorè, é tler y modern. Chilò podëise dè na odlada ai prototips dla plata d'azès nöia dl'Aministraziun provinziala www.provinzia.bz.it.

Plata web Aministraziun provinziala

Orëise dè jö n comentar? Druchede prëibel sön Formular-feedback. Dilan